打比郡乘勝追擊列斯聯

猪拉多纳

阿King今日繼續講英冠，列斯聯喺主場迎戰升班熱門「綿羊」打比郡，「綿羊」呢排近況大勇，連贏3場，仲要場場都保持清白之身，今仗更比列斯聯多一日休息，1.77倍客勝唔怕追呀！（TVB 301周三凌晨3時45分直播）

打比郡今季搵嚟前皇馬助教保羅基文迪領軍，開季頭5場都不勝，令人質疑保羅基文迪係咪真係咁有料，不過時間證明一切，經過季初適應期後，打比郡愈踢愈有，最緊要係防守穩健，23戰只失13球，僅次於出名防守力強嘅米杜士堡。「綿羊」喺Boxing Day以2比0完勝富咸，而列斯聯遲一日先有比賽，仲要係作客諾定咸森林，抖得1日就要鬥打比郡，真係戥班列斯聯球員辛苦。

其實列斯聯陣中有不少突出新星，好似路易斯曲克、森拜林及阿歷士莫華特等，前兩者更被傳獲曼聯同利物浦睇中，不過列斯聯冇雄心，年年都冇力爭升班，班主施連奴又成日搞搞震，球員都唔想為咁嘅球隊搏喇！打比郡就唔同，過去兩季都爭少少就上到英超，今季球隊上下抱住不成功便成仁嘅決心，依家球員狀態大勇，防守又堅，體力更佔優，有齊各種有利因素，一於簡簡單單捧客勝！
葉士域治洛達咸受讓串燒

同樣係升班熱門嘅白禮頓就會喺主場鬥葉士域治，白禮頓有後衞羅仙尼亞、中場蘇利馬治等主力缺陣，球隊近4仗不勝，讓唔起作客四連勝嘅葉士域治喎，捧讓球客勝！最後講埋富咸主場對洛達咸呢場波，富咸近4仗主場不勝，反觀洛達咸喺上場護級大戰中大炒保頓4比0，球員士氣大振，今場受讓捧得過。