狐狸唔夠兵熱刺起革命

猪拉多纳

今季英超變天，車路士、曼聯內亂頻生遭遇滑鐵盧，利物浦換帥冇起色，反而「狐狸」李斯特城及熱刺崛起，聯同阿仙奴及曼城成為「爭標集團」。「狐狸」異軍突起，但人腳始終比較單簿，聖誕快車連鬥勁旅顯得力有不逮，加上季尾惡戰連場恐怕後勁不繼。曼城、阿仙奴有歐聯後顧，存在不明朗因素，要留意熱刺唔聲唔聲，隨時爆冷跑出。

李斯特城「勵志故事」值得欣賞，但聯賽好考耐戰力，「狐狸」近兩仗鬥利物浦、曼城都入唔到波，可見級數同傳統豪門仍有距離。球隊太依賴占美華迪、馬列斯搵食，一旦兩人失準或甚1月離隊，肯定嚴重打擊實力。李斯特城明年2月連接鬥利物浦、曼城及阿仙奴，如果被打窒道氣信心必受打擊，加上5月最後3仗要對曼聯、愛華頓及車路士，前領優勢好難捱到尾。
曼城雙線作戰有隱憂

明年2月歐聯16強展開，阿仙奴、曼城雙線作戰成為最大「敵人」。兵工廠年初即陷「地獄賽程」，1月已要對紅軍及車仔，2月仲大鑊，連接對「狐狸」、巴塞隆拿、曼聯，之後賽程要視乎歐聯能否晉級而定，5月尾二輪聯賽作客曼城亦係關鍵。曼城歐聯16強鬥基輔戴拿模相對較易踢，聯賽賽程對手強弱分布亦較比均，對爭標有利。

熱刺現時只落後榜首阿仙奴4分，會方一向唔重視歐霸，應會主攻聯賽。熱刺下半季最惡頂只係4月初連續鬥利物浦同曼聯，最後5場聯賽對手僅對車路士較難踢，從後居上搶走英超錦標亦唔出奇。