撐飛腳砌低紅鑽捧盃

猪拉多纳

新一年新開始，今午於東京味之素球場爆發日本天皇盃決賽，由浦和紅鑽火併衞冕嘅大阪飛腳。上季飛腳擸晒日職、日聯盃及日皇盃，威過威士忌，但今季要兼顧亞冠盃，明顯力有不逮，先喺亞冠4強遭FC廣州淘汰，10月尾日聯盃決賽慘吞鹿角3蛋，上月幾經辛苦殺入日職季後賽總決賽，可惜兩回合以3比4不敵廣島三箭，依家淨番日皇盃可爭，為面子點都唔衰得，決心唔使懷疑。
宇佐美貴史做老竇當旺

飛腳射手宇佐美貴史早排迎來女兒出世，呢位新任爸爸隨即大爆發，於日皇盃8強及4強擊敗鳥棲砂岩同三箭均省兩粒，旺到冇朋友。況且之前5次對紅鑽，飛腳於法定時間錄得3勝1和1負佳績，若計埋加時飛腳贏咗4仗添，擺明格食格，撞正紅鑽主力柏木陽介及岡本拓也因傷倦勤，飛腳有力攞番個尾彩，其「冠軍」有1.92倍值得捧場。

（有線148台周五下午1時15分直播）