英超6寶全攻略

猪拉多纳

迎接2016年來臨，足智彩今年1月2日「6寶半全場」彩池特別增設100萬多寶獎金。6關全為英超賽事，今日就幫大家做統計同分析，揀番最正路及次選畀大家，而且仲同大家用唔同成本投X「6寶半全場」，想新年發橫財，留意吼實喇！
第1關：馬會編號（六）6 李斯特城 Vs 般尼茅夫

神奇球隊李斯特城先後對完利物浦及曼城後，主場出戰般尼茅夫，當然要繼續搶分，睇番兩軍對賽，「狐狸」佔有優勢，從未輸過，全場可以諗少一瓣，而當中李斯特城贏波都係開「半和全贏」，「和主」可以揀先；至於般尼茅夫今季英超輸波，好多時都係一早就輸，開「半輸全輸」，次選「主主」。
第2關：馬會編號（六）7 曼聯 Vs 史雲斯

出乎意料之外，近年史雲斯對住曼聯成績非常出色，現階段史雲斯護級陷入水深火熱之中，根據往績數據，不妨冷敲「天鵝」。兩軍近5次對賽，史雲斯半場從未落後過，其中4次不分高下，「半和」一定係熱選，先揀「和客」；而曼聯輸波通常只會開「和輸」或「輸輸」，信史雲斯贏波嘅，不妨揀埋由頭贏到尾嘅冷門「客客」。
第3關：馬會編號（六）8 諾域治 Vs 修咸頓

數據勝於一切，修咸頓近兩次對住諾域治都係開「半贏全贏」，「金絲雀」絕對係修咸頓私房菜，今場半全場「客客」係必然選擇，不過，兩軍始終經過快車賽程，修咸頓更先後對阿仙奴同韋斯咸，唔多唔少都會有啲回塘，今場未必會搶韁，補番個「和客」較為保險。
第4關：馬會編號（六）9 新特蘭 Vs 阿士東維拉

兩支護級隊伍喺新年碰頭，將會係今輪其中一個焦點所在，不過，原來新特蘭喺光明球場對住維拉毫無優勢可言。近3次維拉作客全部贏晒，上季更半場已領先4:0，睇嚟維拉都係食住「黑貓」，熱選由頭贏到尾嘅「客客」，補番個「和客」原則上已經萬無一失。
第5關：馬會編號（六）10 西布朗 Vs 史篤城

西布朗同史篤城兩支中游球隊實力相近，踢法都係穩中求勝，對碰相信都係難分難解，半場未必有高低。西布朗基於兵源問題，去到新年第一場，即係聖誕新年快車第4輪，通常都有啲體力問題，所以半場都唔會急攻，守和半場先，近5年首戰有4場同對手打和，「半和」係鐵膽；而呢5戰有3場最終都要輸波，今場首選係「和客」，次選「客客」。
第6關：馬會編號（六）58 屈福特 Vs 曼城

繼續向聯賽冠軍寶座進發嘅曼城，快車尾站對屈福特肯定係喜訊，全取3分在望。曼城近年對升班球隊成績有保證，近3仗全勝，包括首循環對屈福特輕鬆贏2:0。睇番3場取勝過程，1場開「半贏全贏」，2場開「半和全贏」，正正就係今仗對手「大黃蜂」，所以揀半全場就最好「客客」同「和客」兩瓣。