噴射機殘陣啞火吼細

猪拉多纳

今日雖然只有10幾場波，但阿King依然搵到好嘢，就係晏晝嘅澳職獨腳戲，由紐卡素噴射機主場鬥墨爾本勝利。噴射機近期表現低沉，近8仗未贏過之餘仲連續4場食白果，攻力認真麻麻。勝利近4仗作客都輸波，今仗相信會踢得保守以唔失波為首要目標，阿King估計今場入波唔會多，一於捧細盤。

（有線64及203台周日下午2時直播）

噴射機自踏入11月後表現每況愈下，近8仗未贏過之餘仲連續4場冇波入，當中更輸咗3場，可見狀態非常曳。更不幸係今季表現可人嘅中場戴夫卡尼因累積5面黃牌停賽，翼鋒夏列迪就要長抖，而左閘李記帝將要轉會至韓職蔚山現代而缺陣，實力受削下今仗難望反彈。

勝利近況同樣唔好，連續5場未贏過，當中作客嘅4場仲要輸晒，可見呢班波客戰腳軟。勝利近期亦陷入啞火問題，最近5場波只係入得兩球，似乎需盡快搵出解決辦法，今仗有後衞尼高拉斯安素因傷缺陣，中場古希美同馬夏斯有傷上陣成疑，要攞到入球絕非易事。阿King估計今場入波唔會多，細盤有兩倍值得支持。
PSG遇弱有鑊氣

至於法足盃會進行64強賽事，法甲班霸巴黎聖日耳門（PSG）作客非聯賽球隊華斯基荷。華斯基荷雖然喺上圈爆冷淘汰法乙嘅梅斯晉級，但PSG球員質素咁高，今仗就算有前鋒卡雲尼、中場柏斯托尼同史譚保利因傷唔踢得都夠殺，讓球主客和PSG讓二球都照捧讓球客勝。

（TVB 301周日晚上9時15分直播）

而卡昂會喺主場同馬賽上演法甲球隊對碰，卡昂近4仗未贏過，相反馬賽自換帥後表演回穩，更錄得連續9場不敗，今仗有力反客為主，小讓平半捧上盤。

（TVB 302周一凌晨3時45分直播）