愛華頓 曼城防線穿「大」窿

猪拉多纳

今晚上演另一場英聯盃4強首回合賽事，愛華頓喺自己地頭擺擂台迎戰曼城。考慮到雙方防線同樣漏洞多多之餘，而且各有主力中堅缺陣，想保持不失睇怕都冇乜可能，心水之選吼1.65倍入球大。

（TVB302台周四凌晨4:00直播）
盧卡古 耶耶托尼腳風順

「拖肥糖」喺啱啱嘅聖誕快車期間，4戰夾埋失咗8球，睇得出班波防守堅信唔過。雪上加霜嘅係，領隊馬天尼斯賽前明言，中路守將菲臘積基爾卡因為身體狀態未回復好，今仗都唔使預佢，可以預期愛華頓防守唔會有太大改善。

另邊廂嘅「藍月亮」亦唔好得好多，自從鐵衞高柏尼受傷後，班波近11戰只得1仗可以零封對手。家陣兩軍防線同樣水鬥水，偏偏愛華頓射手盧卡古同曼城中場耶耶托尼腳風勁順，咁搞法唔驚今仗會變成悶戰一場咯。