維拉積弱有排衰 水晶宮客W有計

猪拉多纳

英超包尾大幡阿士東維拉可謂低處未算低，上仗英足盃對乙組仔韋甘比竟然都贏唔到，賽後仲發生隊長米卡李察士同球迷對罵事件，民心士氣進一步插水。維拉今晚英超主場鬥水晶宮，恐怕難獲Fans支持，咁嘅情形一於再反維拉，捧近5次作客不敗嘅水晶宮客W。

（now 623周三凌晨3時45分直播）
信心已失愈踢愈躁

維拉上年10月尾炒咗舒活，改由法國人加迪執教，但一啲起色都冇，加迪領軍後9戰錄得有4和5負，一場都贏唔到。事實上，維拉自開鑼戰擊敗般尼茅夫之後，就再未喺英超贏過波，如果計埋盃賽，球隊近16仗嘅戰績更加係5和11負，可謂衰到貼地，長期積弱之下，球員信心已蕩然無存，而且愈踢愈躁，隊長米卡李察士上仗英足盃雖然為球隊入波，但仍被韋甘比逼和1比1，即時遭球隊鬧爆，米卡李察士離場時仲唔知衰駁嘴，雙方幾乎講手，試問維拉球迷又點再撐佢哋，睇來呢隊波仲有排衰。

水晶宮上仗英足盃力挫修咸頓晉級，總算打破近3仗嘅入球荒，佢哋近5仗作客取得3勝2和。水晶宮至今仍可以位居第7位，證明球隊的確有料到，韋費特沙夏、卡比耶踢法都具侵略性，連後衞史葛丹恩都有3球進帳，今仗作客維拉公園真係未驚過，一於趁佢病、攞佢命。