日本爭標要睇「孖拓」

猪拉多纳

南韓柳承佑孭重飛

身為爭標大熱門，日本U23同南韓U23嘅人腳實力當然唔曳，日本有淺野拓磨同南野拓實組成被譽為「10年一見」嘅天才前鋒組合，前者協助廣島三箭贏得日職總冠軍，後者外流奧地利薩爾斯堡唔單止穩奪正選，今季已經射入7球，呢個「孖拓」組合超令人期待！至於南韓U23就有效力德甲利華古遜嘅柳承佑孭重飛，一樣唔可以睇小！
淺野拓磨被譽「東瀛阿蘇」

21歲嘅淺野拓磨有「日本蘇亞雷斯」之稱，充滿野性同靈性，侵略性及突破能力極強，反應又快，搶點意識亦佳，入波方式每每出人意表。淺野拓磨上年協助廣島三箭贏得聯賽冠軍，自己亦當選日職最佳新人，出色表現受到日本隊主帥夏利荷錫嘅青睞，選佢入國家隊，前途無可限量。

同樣已經進身日本大國腳嘅仲有南野拓實，呢位20歲射手今年到奧地利發展，估唔到話咁快就成薩爾斯堡嘅主力，喺職賽出戰19次轟入7球，充分顯示強勁把握力，同淺野拓磨拍住上，絕對係對手後防噩夢。

日本有「雙拓」，南韓U23都有位「韓版香川真司」柳承佑，22歲嘅佢可司職鋒線所有位置，喺2013年世青盃大放異彩，對葡萄牙一戰以一腳凌空抽射入網，更入選賽事候選最佳金球，終獲德甲嘅利華古遜睇中。今次賽事南韓有柳承佑助陣，實力即刻升晒「呢」！