FC悉尼受讓嗒糖 打吡戰恰慣流浪者

猪拉多纳

今日有三場澳職賽事，重頭戲係「悉尼打吡戰」，「二哥」西悉尼流浪者主場激戰「四哥」FC悉尼。話明係打吡戰，雙方例牌踢得激，但睇番雙方最近5次交手，FC悉尼未輸過錄得4勝1和佳績，今場有得受讓當然要捧喇！

（有線64及203台周六下午4時30分直播）

上季排尾2嘅西悉尼流浪者今季表現大躍進，踢咗14場澳職，戰績係8勝3和3負，前鋒馬克布歷治同進攻中場尼高斯合共取得12個入球，不過佢哋今場嘅對手係澳職失波最少球隊FC悉尼，入波仲可唔可以當食生菜真係好難講。FC悉尼14戰僅失12球，一對中堅祖文同懷奧功不可沒，一高一矮相當合拍。西悉尼流浪者今場有前鋒蘇迪里奧代表澳洲出戰U23亞洲盃而缺陣，馬克布歷治對住對手兩大中堅，相信孤掌難鳴。

雖然西悉尼流浪者近6仗主場贏足5場，不過FC悉尼今季作客都係輸過1場咁大把，加上係打吡戰嘅關係，球員為面子都落足力保住不敗，球隊近5次對西悉尼流浪者都唔使輸，今場一於捧讓球客勝！
阿聯主將回歸劏水手

至於早場就有阿德萊德聯主場鬥中岸水手，主隊今場有中場奧沙麥馬歷、杜簡錫回歸，實力進一步提升，相反水手有守將普斯高尼路停賽，加上球隊作客例牌腳軟，今季6場作客輸咗5場，阿德萊德聯主場3連勝，讓一球嘅上盤值得捧場。

（有線64及203台周六下午2時15分直播）