比甲重開即演榜首大戰

猪拉多纳

比甲歇冬後首輪即上演榜首大戰，一哥真特主場迎戰二哥安德列治，小球會真特近年火速崛起，自新主場落成後踢大戰成績優異，今晚有足夠信心搶攻；安德列治經過上季失敗後亦痛定思痛，對今季冠軍志在必得，球隊前線有把握力強嘅意大利99號仔奧卡卡卓卡孭飛，力爭3分目標清晰，今仗預期係對攻好戲，Anton推介1.88倍大盤。

（周日晚9時30分開賽）
真特安德列治火力猛

真特只係比利時一個小城市，但近年管理得宜加上人才輩出，成為比甲新崛起雄軍，2013年佢哋嘅芝林高新主場落成後，成績更上一層樓，上季終於取得球會史上首次比甲冠軍，雖然成就有排都唔可以同曾33次奪冠嘅安德列治相提並論，不過現時戰鬥力確不在對手之下。真特喺新主場踢大戰成績特佳，今季聯賽就曾經大炒另一勁旅布魯日4比1，歐聯亦贏過華倫西亞同辛尼特等強隊，史上首次打入歐聯16強，令佢哋最低限度可以得到2,100萬歐元收入，會方亦因應形勢增兵，歇冬期買入咗4名生力軍補強各線，球隊首循環作客安德列治都可保不敗，今仗主場更添爭勝信心。

安德列治上季聯賽只得季軍，無緣今屆歐聯賽事損失慘重，今季季前已聲言失敗可一不可再，矢志要重奪錦標，佢哋只要今仗作客贏波，即可搶去對手榜首位置，安德列治歷來作客對真特贏多輸少，今仗當然唔會保守，球隊前線擁有意大利國腳奧卡卡卓卡，呢位前羅馬同森多利亞射手把握力強，作客一樣有信心攻破真特防線，預期入波唔會少。