卡塔爾南韓射手入球騷

猪拉多纳

另一場U23亞洲盃4強，東道主卡塔爾U23迎戰南韓U23，今仗唔止係決賽入場券之爭，仲係神射手大混戰！卡塔爾「孖寶」阿爾丁、鴨都卡林哈辛今屆已各有4球進帳，南韓「雙雄」權昌勛、文昌鎮亦各入3球。4大攻擊猛將大火併，可望上演入球騷，Mic少首選入球大。

（now 671周三凌晨零時30分直播）
爭神射手盡情入波

卡塔爾U23今屆憑主場之利踢出霸氣，分組賽3戰全勝，8強加時以2比1淘汰北韓，即使單計90分鐘法定時間，4戰都入咗10球；前鋒阿爾丁、後衞鴨都卡林哈辛合共貢獻8球，兩人同樣以4球並列射手榜第1位。事實上，卡塔爾身為主辦國，爭標決心特別強，加上有主場球迷打氣，因此每場都要贏到盡，除咗力爭捧盃之外，阿爾丁同鴨都卡林哈辛亦想趁機攞埋神射手殊榮，相信會繼續喪攻對手。

南韓U23兩位中場權昌勛及文昌鎮同樣有出色表現，球隊今屆入9球，有6球由佢哋包辦。唔好忘記陣中仲有利華古遜前鋒柳承佑，中前場人才濟濟。南韓喺8強順利90分鐘內擊敗約旦，慳番唔少體力，嚟到4強階段唔會再有保留，預料會同主隊搏槌，吼大盤啱數。