勝利「BBB」搵番入波方程「悉」

猪拉多纳

澳職今日有爭標大戰上演，狀態回勇嘅墨爾本勝利主場激戰FC悉尼，兩大勁旅近期狀態都好突出，不過衞冕嘅墨爾本勝利實力始終較高，尤其「BBB」鋒線重現霸氣，大有上季橫掃澳職嘅威勢，今日主場出擊有力擊敗大敵立威，1.93倍主勝值得捧場。

勝利經歷「黑色12月」1和4負嘅慘痛後，踏入2016年簡直係脫胎換骨，近3場聯賽2勝1和，最令球迷有信心嘅，係班波恐怖火力再現，近2場波喪入7球，阿爾巴尼亞王牌前鋒貝利沙近5場入5球，「BBB」拍檔賓卡法拿、巴巴路西斯亦有斬獲。勝利季初狀態最好嗰陣，作客都可以4:2大炒FC悉尼，今次主場出擊有望再踢好波！
FC悉尼近5次作客僅1勝

FC悉尼近4場聯賽3勝1和攻入10球，不過佢哋作客表現唔算突出，近5場作客聯賽只得1勝，包括上場「悉尼打吡」去到完場前一刻先至絕殺贏波，以佢哋作客咁冇說服力嘅表現，今場對住王者墨爾本勝利睇怕冇運行。