史特加漢堡大鬥法

猪拉多纳

兩軍士氣高漲有得砌

周末德甲壓軸戲史特加主場迎戰漢堡，兩軍近季經歷可謂難兄難弟，睇紙上近績史特加無疑係好啲，但漢堡狀態同實力絕不遜色，今仗勝負難料，兩軍目前都士氣高漲，而且中前場個個當弗，入球大細中位數調整到兩球半、三球好合理，黑柴撐1.92倍大盤。

（now 670、有線61及64台周日凌晨1時30分直播）

史特加季初開得曳，但自從提升咗原二隊教練卡藍尼領軍後，士氣同表現循序漸進，歇冬後首仗作客擊敗科隆，新加盟嘅前多蒙特守將哥斯基奧斯更大讚2016年「沒有更好嘅開始」！贏科隆之後，史特加除喺德甲兩連勝外，亦保持正式賽事5戰不敗，係球隊自2013年2月以來首次，對呢支積弱球隊嚟講好唔簡單。球隊主力射手夏歷養傷，少咗呢位把握能力甚差嘅「敗家仔」，更有利卡藍尼重組進攻線，佢激活咗進攻中場迪達維同箭頭迪姆華拿，兩人近期勇達巔峰，腳風超順，史特加今晚係今年首度主場出擊，當然有決心搶攻求勝。
漢堡中場富創造力

漢堡近4場聯賽得1分，不過球隊連仗遇強敵都有好表現，尤其上輪鬥班霸拜仁，對手只靠一個唔應該判嘅問題12碼開紀錄，最終漢堡僅敗1比2，但已踢出今季代表作。球隊周一復操所見士氣如虹，好似贏完波咁款，拉巴迪亞喺場邊不斷叫好。球隊近期收到壞消息，健康同狀態回勇嘅技術型中場伊利斯域宣布踢埋今季會外闖尋求新挑戰，但佢會盡一切努力喺餘下比賽為漢堡爭取佳績，漢堡中場有佢同新加盟嘅指揮官肯特，配合攻守兼備嘅尼古拉梅拿同賀治比，創造力大增，足以為箭頭拉蘇加提供充足供應，作客有本錢同史特加駁火。