聖人復甦翻轉兵工廠

猪拉多纳

「三哥」阿仙奴則喺主場硬撼「聖人」修咸頓，兵工廠今輪於聯賽頻頻失分，啱啱喺英足盃都係險勝晉級，明顯信心出現問題，相反「聖人」修咸頓全面復甦，挾3連勝氣勢，造訪酋長球場有力全身而退，受讓必揀「聖人」讓球客勝。

(now 622周三凌晨3時45分直播)
修咸頓贏完曼聯醒神晒

阿仙奴之前3場聯賽，先後賽和利物浦、史篤城及輸畀車路士，就算日前於英足盃派出基奧特、阿歷斯山齊士、哥斯尼等主力配一班副選上陣，亦只能險勝英冠仔般尼一粒，後備入替嘅禾確特單刀又腳軟，後防又慌失失，踢落唔多夠信心喎。另一邊廂，修咸頓近3場聯賽贏晒，包括靠新兵查理柯士甸一箭定江山作客勇挫曼聯，主帥朗奴高奴已帶領「聖人」走出之前10場僅1勝嘅低潮，信心返晒嚟，何況佢哋不嬲唔驚阿仙奴，近5次碰頭錄得3勝1和1負佳績，首循環喺主場更大勝4球。

除咗查理柯士甸初來甫到即有貨交外，杜辛泰迪治、沙恩朗及禾特普斯亦弗番，加上修咸頓已於英足盃出局，可以逸待勞備戰今仗，此消彼長下，就算作客都唔赦阿仙奴，仲有得受讓咁筍，讓球客勝咪錯過。