今晚打真‧軍

猪拉多纳

4大聯賽阿3老2追1哥

講波佬經常有句：波係圓嘅，未到最後一刻，任何事都有可能發生！今晚西意法德4大聯賽嘅「阿2」、「阿3」分途出擊，為追趕榜首、為突破自己一於踢爭氣波，全力搏殺搶分，把握餘下賽程創造勵志故事，保證場場打真軍！
馬體會大盤冇走雞

繼西班牙盃出局後，馬德里體育會又喺西甲榜首大戰不敵巴塞隆拿1比2，依家馬體會打少巴塞一場之餘，落後對方3分，今晚主場鬥伊巴，「床單軍團」更有後衞菲臘路爾斯及高甸停賽，不過伊巴近排亦防線大穿窿，今場兩邊都不設防，入球大有計！

（now 632周六晚11時直播）

馬體會向來以防守見稱，但近2場共失5球，對住巴塞失2粒都算正常，喺西班牙盃主場輸畀切爾達2比3就真係抵打，該仗一場失夠3球更屬今季第1次！「床單軍團」為追趕巴塞，相信今場以攻為先，球隊日前賣走積臣馬天尼斯，就係因為主帥施蒙尼信得過另一王牌基沙文，呢位法國射手射得又傳得，難怪有傳其身價升至6,000萬鎊（約6.8億港元）。
伊巴連續7場開大

排喺第8位嘅伊巴連續7場開大，當中有5場總入球數高達4球或以上，隊中神射手保查干沙利斯近3場入咗5球，至今已經有15個聯賽入球，睇嚟跳去大會係遲早嘅事。不過球隊後防唔爭氣，近3場失8球，包括上次作客畢爾包輸2比5，睇怕今場大盤都冇走雞！