費倫新箭醒客W博得過

猪拉多纳

意甲「三哥」費倫天拿作客博洛尼亞，「紫百合」費倫天拿現時落後榜首拿玻里8分，但今季意甲爭標形勢激烈，費倫仲有機會趁亂殺出血路，新兵莫路沙拉迪上仗開齋，令球隊增添一把利器，可破博洛尼亞大門，直取客勝。

（TVB 301周日凌晨1時直播）
博洛尼亞冇壓力欠鬥心

祖雲達斯季初大量失分，冇咗以往超班優勢，令其他球隊有捧盃希望，費倫、國米及拿玻里輪流做過榜首。費倫過去3季都位居前4位，水準穩定，球隊等緊機會反超前做「一哥」，就算最終贏唔到冠軍，都要力爭躋身前3，參加下屆歐聯。會方上月簽入莫路沙拉迪，呢位阿根廷射手曾效力拉素、國米，今次從韋斯咸重返意甲，自然駕輕就熟，佢上仗補時入波以2比1絕殺卡比，盡顯功架，有莫路沙拉迪助陣，費倫如虎添翼。

博洛尼亞今季升上意甲，主要目標係留級，現時排第10冇乜降班壓力，鬥心自然唔夠大，上仗就輸畀尾二嘅費辛隆尼。今仗面對來勢洶洶嘅費倫天拿，更加冇得打。