般尼茅夫搶分大堆頭

猪拉多纳

近排瘋狂失分嘅阿仙奴今晚作客般尼茅夫。牌面睇「兵工廠」梗係勝一籌，但球隊近6場聯賽作客只係贏過包尾大幡阿士東維拉，而且防線表現唔太理想，今仗面對志切搶分護級，狀態唔錯嘅般尼茅夫，隨時上演「入球騷」，阿謙決定支持大盤。

（now 621周日晚9時30分直播）
阿仙奴防線穿窿

阿仙奴近4場聯賽跌晒Watt，只得3和1負，唔單止冇咗個榜首位置，仲畀死敵熱刺爬埋頭，依家排喺第4，難怪唔少評論都話「兵工廠」又重新開始「前4 Mode」。阿仙奴中場路斯基長抖3個月、辛迪卡索拉、韋舒亞同前鋒韋碧克亦未好返，球隊前線雖然仲有唔少好手在陣，但近6仗客戰失咗10球，後防嚴重不穩，今仗要保住清白之身唔容易。

般尼茅夫上仗聯賽作客贏水晶宮，表現認真唔錯。佢哋喺冬季轉會窗羅致咗高大中鋒阿科比同埋阿根廷前鋒伊度比，其中前者已經喺聯賽入咗3球，表現好對辦。般尼茅夫踢法充滿激情，近5仗主場有4次開大盤，今仗雖有後衞泰朗明斯、前鋒麥斯格拉度同哥林威爾遜有傷唔踢得，但遇上攻強守弱嘅「兵工廠」，急切搶分下預計會有唔少入球出現，大盤好路。