賓菲加主場讓平半超筍

猪拉多纳

辛尼特仲歇緊冬硬晒軚

今晚另一場歐聯16強首回合賽事，葡超班霸賓菲加主場迎戰俄超嘅辛尼特。當歐洲各大聯賽自歇冬後戰火已經重燃咗成個月，俄超到依家仍然係歇緊冬，要到3月先重開，抖咗咁耐一嚟就要踢咁重要嘅歐聯淘汰賽，辛尼特班球員身心都未準備好，今場賓菲加讓平半，上盤抵玩！

（有線62、202台周三凌晨3時45分直播）

賓菲加身為葡超班霸，人腳質素當然有番咁上下，王牌球員奧斯華度加坦係球隊歐聯入球王，轟入3球，呢位翼鋒往往能睇準時機後上入楔射門；巴西籍前鋒莊拿斯干卡維斯喺聯賽踢咗22場就已經射入23球，佢同後上嘅美度古近3戰合共取得9球，腳風極順；中場新星連拿度辛捷士更係潛力無限，年僅18歲嘅佢喺上場對波圖嘅葡超大戰更當選最佳球員，多支英超豪門如阿仙奴、利物浦等均派估波觀察其表現。所以同擁有侯克、韋素、迪斯尤巴等球星嘅辛尼特相比，賓菲加實力並不下於對方。
辛尼特淘汰階段至係考驗

辛尼特喺歐聯分組賽一枝獨秀，以5勝1負成績首名出線，但其實組內對手華倫西亞同里昂實力已今非昔比，而首次參戰歐聯嘅真特亦輸經驗，所以辛尼特嚟到淘汰階段鬥賓菲加先係真正考驗。雖然賓菲加上場以1比2不敵波圖，但喺呢場之前，賓菲加已經連贏11場，狀態大勇，至少肯定比歇緊冬、要靠熱身賽操起狀態嘅辛尼特好，今場撐賓菲加把握主場之利KO辛尼特，捧上盤！