費倫巴治地獄主場拆火車頭

猪拉多纳

歐霸盃32強首回合，率先上演費倫巴治主場對莫斯科火車頭，土耳其「豪門」費倫巴治星味十足，擁有前曼聯射手尹佩斯、拿尼、巴西中場迪亞高、丹麥中堅卡積亞，前中後三線猛將如雲，令人期待，加上土俄二國關係緊張，費倫巴治必定搏命，為國爭光。俄超仍在歇冬，火車頭球員狀態成疑，前景睇淡，捧費倫巴治主勝。

（now 670周三凌晨1時直播）

土超球隊近年大事招攬球星加盟，費倫巴治身為傳統Big3，自然成為吸「星」大戶。陣中尹佩斯、拿尼、卡積亞、迪亞高都曾於歐洲4大聯賽搵食，可惜前車路士中場魯爾梅利斯養傷，否則陣容更強大。呢班球星雖然高峰期已過，但爛船都有三斤釘，特別係拿尼不時有佳作，射入靚罰球。佢哋大賽經驗豐富，出戰歐洲賽可大派用場。同埋費倫巴治不惜工本羅致球星，就係想揚威歐洲，對呢項「二奶盃」亦非常重視。
土俄關係緊張更唔衰得

值得一提，上年11月發生土耳其擊落俄羅斯戰機事件，兩國關係勢成水火，令今場火藥味更濃。土耳其球隊主場球迷出名火爆，費倫巴治今場肯定當成生死戰咁踢，全力爭勝，否則好難向國民交代。

俄超自去年12月中開始歇冬，要等到3月初先至重開。換言之，莫斯科火車頭已經兩個月冇踢過正式賽事，球員狀態可能不足，一下子要應付大戰，隨時吃不消。