尹帥「貝」城借一紅魔殘陣難靠

猪拉多纳

同鄉睇死唔掂 炒魷即請旅行

外號「紅魔」嘅曼聯以前人見人怕，不過呢隻魔鬼近年已經嚇唔到人，今晚佢哋喺英格蘭足總盃16強作客梳士貝利，牌面睇的確係以強凌弱。可惜尹戈爾依家成為曼聯負累，連荷蘭旅遊公司都幫佢制訂「炒魷旅行計劃」贈興。相反英甲仔梳士貝利近況唔算差，而且抖足抖夠，一人行多一步有力頂住曼聯，3.3倍「讓主」值得一試。

（開賽時間：周二凌晨3:45）

曼聯今季有幾令擁躉失望，相信唔使再多講，淨係睇佢哋上場作客輸畀連歐洲三線球隊都稱唔上嘅米迪蘭特就知啦。領隊尹戈爾做咗曼聯千古罪人，荷蘭網上旅行公司GeniusTravel，尋日宣布如果曼聯今場輸波後尹帥被炒，佢哋會免費請尹戈爾兩公婆旅行，仲話已經預備好飛機同靚車接載，連同胞都寸爆佢呀，陰功！
紅魔傷兵多 方丈都投降

唔講其他，齋係紅魔傷兵問題就足以搞到尹戈爾頭都大晒。包括前鋒朗尼、中場費蘭尼、守將馬高斯盧祖、達美安、門將迪基亞等4線、夾埋超過10件球員打柴，難怪連一向死要面唔認輸嘅「方丈」上仗賽後都投晒降：「當你有14名球員受傷，你好難應付咁樣嘅傷兵名單。」

雪上加霜嘅係，紅魔兵源愈嚟愈短缺，可惜賽程仍然密集唔等人。今戰已經係紅魔15日內第4場作客比賽，點到班魔兵唔殘吖？睇番佢哋對上3場波，全部都喺比賽尾段失守，被對手追和甚至反勝，就知班波已經莫氣無以為繼。以頹魔近10場作客只係贏得2鋪嘅走勢嚟睇，就算今仗對手低兩級都捧唔過囉。
梳士貝利無懼越級挑戰

再講吖，對手梳士貝利近況都叫見得吓人，近8戰取得4勝1和3負，而且佢哋越級挑戰都唔見腳軟，對上兩圈挑戰英冠球隊，作客卡迪夫城同主場迎戰錫周三，都成功喺法定時間內解決對手晉級，相信梳士貝利已經習慣喺被睇淡下打波。更着數嘅係，梳士貝利喺13日打贏黑池後，足足有10日時間養精蓄銳備戰今仗，成隊波每人跑多步，都夠頂住今非昔比嘅曼聯咯。