曼城爆基玩大佢

猪拉多纳

為咗今場歐聯16強首回合作客烏克蘭球隊基輔戴拿模，曼城上場英格蘭足總盃鬥車路士留力而招大敗，「藍月亮」今場全力出擊，誓要贏波搵對手出番啖氣，不過呢隊波攻強守弱，喺歐聯分組賽6場失咗8球，基輔主場有一定戰鬥力，寧博2.02倍嘅入球大。

（有線61、64、201及203台周四凌晨3時45分直播）

堂堂英超豪門曼城，無論金錢定兵源都比其他球會多，竟然話因為賽程緊密，而喺上場足總盃對車仔派大量副選同青年軍迎戰，輸1比5係攞嚟衰，畀外界插爆唔尊重足總盃都好正常。「藍月亮」今場出番阿古路、大衞施華、耶耶托尼等主力，冇得唔贏，採取主攻誓要大打爭氣波！
高柏尼未弗防線有漏洞

雖然話自從曼城落實下季改由哥迪奧拿執教，比歷連尼疑似「hea做」，連輸2場鬥李斯特城及熱刺嘅聯賽大戰，足總盃更離譜到出小將，導致「藍月亮」3連敗。不過再諗真啲，62歲嘅比帥教咗廿幾三十年波，喺球壇有一定嘅江湖地位，又點會咁傻仔，為報復曼城而專登教衰啲？咁樣只會整臭自己個朵，對比帥冇着數，所以曼城今場一定會認真作戰，力爭作客入球！

不過曼城今季喺中堅高柏尼長期養傷下，防守好唔穩陣，分組賽6仗失8球，係16強入面失波最多球隊，另外兩位中堅奧達文迪、迪米捷利斯水準飄忽，雖然高柏尼已經傷愈復出，但聯賽主場輸畀熱刺一戰見到佢狀態未弗，今場防線仍有漏洞。
基輔戴拿模有力駁火

基輔戴拿模喺歐聯分組賽3仗主場不敗，而且能夠力壓葡超勁旅波圖出線，具一定戰鬥力。基輔除咗主場0比0打和車路士一役外，其餘5場都有士哥，遇上分組賽6仗5開大盤嘅曼城，入球大捧得過呀！