飛腳慢熱寧捧鹿角

猪拉多纳

日職開鑼，唔少球隊都有季初病問題，表現起伏好大，今日大阪飛腳主場迎戰鹿島鹿角，驟眼睇飛腳絕對有利，但係佢哋出名慢熱，過兩日又要踢亞冠盃，周身唔得閒，平手盤都係博鹿島個1.91倍「客勝」着數啲。

（有線61、201周日下午1:05直播）

假如齋睇往績，飛腳以前主場21戰鹿島，取得10勝5和6負，平手盤買佢哋「主勝」，超過6成機會唔使輸，可以話坐和望贏。但係大家要記住一樣嘢，呢批往績絕大部分係飛腳响萬博競技場創造嘅，家陣佢哋已經有個新主場─吹田市立足球場，今日仲係新球場第一場正式比賽添。飛腳班人對新場嘅熟習程度，點都及唔上萬博，所以唔能夠太信往績。

更重要嘅係，飛腳雖然簽咗前鋒艾迪美臣巴拉加、吳屋大翔、中場藤本淳吾一批好嘢，舊人入面主要走咗個廢廢哋嘅連斯利馬，兵源雄厚過以前，但係呢隊波嘅季初病比較嚴重，監督長谷川健太上任3年以嚟，3場聯賽揭幕戰得2和1負，始終令人有戒心。況且下星期三佢哋又要响亞冠盃硬撼墨爾本勝利，存在後顧之憂，好難放手搏盡。
鹿角年輕化更機動

鹿島鹿角同樣充實咗班底，除咗金崎夢生由葡萄牙回歸，仲有永木亮太、三竿健斗、櫛引政敏呢啲未來新星，成隊波年輕化咗，可以踢到全攻全守嘅機動足球。即使中場柴崎岳做完盲腸手術冇耐仲抖緊，韓國後衞黃錫鎬又養傷，但鹿島依家嘅兵源充裕，根本唔存在排陣難題，今日對住水準飄忽嘅飛腳，平手盤絕對值博。