光輝瞄準噴射機

猪拉多纳

今輪澳洲壓軸戰由珀斯光輝主場對紐卡素噴射機，兩隊都要為季後賽席位全力衝刺，光輝遇到「私房菜」噴射機正係搶分良機。雙方近10次交鋒光輝取得8勝2和，包括剛於個半月前作客大炒噴射機6比1，光輝讓半一必捧上盤。

（有線64及203台周一下午5時直播）
珀軍近6仗喪轟19球

珀斯光輝上仗1比2不敵西悉尼流浪者，被打斷5連勝走勢，但整體狀態仍然勇猛，近6仗共轟入19球，其中兩仗單場入6球，火力非常驚人。射手安迪基奧治已經連續3仗建功，夏朗特、尼保查馬連高域及迪亞高卡斯度亦頻頻入波，攻擊點夠晒多。根據賽制，澳職前6位可以進身季後賽，光輝現時只係落後第6位FC悉尼2分，換言之今仗只要贏波，就可以超前對方，對於爭取季後賽席位非常關鍵，必定搏盡。

紐卡素噴射機落後光輝2分，但今仗想贏相當困難，因為光輝一直係噴射機嘅剋星。近10次對賽噴射機輸8次之餘，近6次作客光輝更加全敗收場。加上噴射機近7仗作客只有1勝2和4負，其中5仗入唔到波，更加難望打破宿命。