雙紅再會吼半和

猪拉多纳

當悶爆曼聯遇上慢熱利記

今晚歐霸盃16強次回合，上演英超雙紅會Part 2，利物浦則作客再鬥曼聯。利物浦首回合贏2比0，今仗只要唔輸多過1球便可躋身8強，紅軍喺今屆歐霸4仗作客未試過喺上半場失守，全部打和0比0，曼聯雖然想翻盤，但佢哋今季喺主場初段總係慢吞吞，近17仗喺自己地頭出擊，竟然開咗14次半場和，加上早前弗爆嘅「福仔」拉舒福特虛火已過，半場和值得追多鋪。（now 670周五凌晨4時05分直播）

利物浦喺首回合全力撳住嚟砌，最終贏2粒算少喇，依家出線形勢大好，梗係會穩陣行先唔使同你急。查實紅軍今屆歐霸盃9戰不敗，而且4場作客都未曾喺換邊前失波，全部開0比0，防線絕對頂得兩嘴。若果將範圍再擴大啲，利物浦近11仗，有10仗上半場冇失波，當中6仗開半場和，挾住3連勝強勢，就算作客都頂得住紅魔。
紅魔主場17仗14仗「半和」

斯維唔會懷疑曼聯想翻盤嘅決心，話晒都係宿敵對決面子攸關，不過喺主帥尹戈爾帶隊下，大踢悶蛋足球，掛住搓波拖慢晒進攻節奏，初段總係老鼠拉龜冇碇埋手，反而有利對方防守，尤其係主場出擊，近17仗喺奧脫福嘅正式比賽，有14仗開出半場和，當中有12仗半場打成0比0。曼聯前鋒兼隊長朗尼續因傷缺陣，早前忽然發威、兩仗入4粒嘅新仔拉舒福特見晒底，近3仗均食白果，「新亨利」安東尼馬迪爾又時好時壞，令紅魔近4仗入得兩球咁大把，就算想翻盤亦有心無力。既然一隊守得，另一隊攻力疲弱，上半場隨時處於膠着狀態，半場和有2倍不容錯過。