阿特蘭大讓波博下盤

猪拉多纳

每逢周日肥叔總會喺意甲搵啲筍盤益大家，貪佢哋冇乜人留意，是日重心推介場次，係意甲早場阿特蘭大主場對博洛尼亞，阿特蘭大連續14仗聯賽未贏過，開盤手竟然開佢哋讓平半，擺明開錯盤，加上出面啲菠菜公司狂吹淡風，捧番博洛尼亞下盤好過。

（TVB 301周日晚7時30分直播）

上周中歐聯16強次回合，一晚冷清清，另一晚熱辣辣，上周三凌晨嘅曼城對基輔戴拿模、馬體會對燕豪芬均於法定時間互交白卷，一眾追大盤嘅散戶真係損手爛腳，但上周四凌晨無論係巴塞對阿仙奴，抑或拜仁對祖記，卻入球停不了。大戶首晚勒住勒住，去到第二晚即出手，早早入定受讓1/1.5球嘅祖記下盤，雖然「斑馬兵團」加時輸2比4出局，但法定時間各二言和，先收一筆，佢哋仲喺下半場中位數3/3.5球嗰陣重注大盤，最終兩瓣收晒，都咪話唔爽呀，肥叔跟住買都執番多少。
博洛尼亞最近和過祖記

講番是日重心推介場次，係意甲早場阿特蘭大主場對博洛尼亞。每個人都有盲點，開盤手亦一樣，除非係祖雲達斯、拿玻里等勁旅，如果唔係通常都會由主隊讓波，但佢哋忽略咗意甲其他球隊實力接近嘅情況，尤其係今仗主隊阿特蘭大，已經連續14場聯賽未贏過，當中輸咗8場，狀態曳到冇朋友。雖然博洛尼亞近6仗僅得1勝4和1負唔太標青，但對手不乏祖記、國米、費倫天拿等硬嘢，當中悶和祖記更係代表作，初盤阿特蘭大要讓平半，肥叔認為唔多合理，出面嘅菠菜公司亦有回飛迹像，一於轉捧博洛尼亞下盤。

另一場較後時間開波嘅意甲，由拖連奴主場對祖雲達斯上演都靈打吡戰。儘管祖記啱啱帶挈肥叔贏錢，不過佢哋同拜仁激戰120分鐘飲恨出局，力疲心傷，今仗初盤要讓半一之餘，仲有逾兩倍高水，擺明熱唔透喇，拖連奴喺打吡戰勢必打甩髀，呢個下盤有買趁早。

（TVB 301周日晚10時直播）