巴西烏拉圭大火併

猪拉多纳

世界盃外圍賽南美洲區上演「巴塞內戰」，尼馬率領巴西主場迎戰有蘇亞雷斯復出嘅烏拉圭！兩人喺巴塞隆拿合作絲絲入扣，今仗各為其主鬥射術，更加令人期待。尼馬身為「森巴兵團」首席球星，固然要做齣好戲，「哨牙蘇」坐完9場國際賽波監肯定餓波，會唔會餓到咬老友尼馬就仲未知，但兩人賽前Side bet一個漢堡包，阿蘇勢必使出渾身解數。兩

大射手火併，一於博入球大。

（周六早上8時45分開賽）

巴塞「MSN」鋒線，尼馬入波較少，皆因佢嘅角色主要輔助「大哥」美斯，但返到國家隊，尼馬就係領袖，球隊圍繞佢來踢，更加可以發揮呢位「新比利」嘅能力，令佢盡情數胡。事實上，年僅24歲嘅尼馬，為巴西上陣69次，已攻入46球，排國家隊射手榜第5位，僅落後第4位薛高2球。以尼馬嘅國際賽入球率，今仗應該又有斬獲。

雖然巴西今屆外圍賽4戰僅2勝1和1負，但要留意兩場主場分別以3比1擊敗委內瑞拉，同埋大勝秘魯3比0，「森巴兵團」喺自己地頭比賽仍充滿霸氣。除咗尼馬之外，巴西陣中仲有辛尼特射手侯克、拜仁慕尼黑翼鋒杜格拉斯哥斯達、利物浦中場菲臘比古天奴、車路士中場韋利安，中場前人腳鼎盛，入波唔成問題。
蘇亞雷斯坐完波監火力猛

另一邊廂，蘇亞雷斯今季喺西甲已轟入26球，仲多過美斯，狀態有幾弗毋須多講。「哨牙蘇」上屆世盃咬意大利中堅基亞連尼，被罰國際賽停賽9場，成為球員生涯最大污點，亦令國家蒙羞，復出首仗更加要落多幾錢肉緊，將功補過。蘇亞雷斯缺陣之下，烏拉圭外圍賽4戰仍然取得3勝1負，今仗有「哨牙蘇」回歸，實力如虎添翼，無懼同巴西鬥攻。

往績方面，兩隊近4次交鋒，巴西取得3勝1和，當中1次大勝4比0，兩次贏2比1，以及1次打和2比2，稍佔上風。不過考慮埋烏拉圭有蘇亞雷斯猛虎出柙，最好都係捧入球大。