巴西烏拉圭開「大」片

猪拉多纳

咬人蘇復出即爆巴塞內訌

聽朝繼續有南美勁旅陪大家食早餐，巴西喺南美洲區世盃外圍賽主場迎戰烏拉圭，焦點落喺同效力巴塞、各自喺國家隊孭飛嘅尼馬同蘇亞雷斯身上，今場係「咬人蘇」刑滿復出後首場國際賽，呢兩位老友賽前用漢堡包賭輸贏，肯定會對攻搶3分，撐1.8倍入球大。

（開賽時間：周六早上8:45）
尼馬省多2粒 國家隊入波追平薛高

雖然尼馬係巴塞「MSN」入面，攞到最少聯賽入球嗰位，咁係因為佢喺球會角色以支援為主。但返到國家隊就唔同講法，所有戰術都圍繞「新比利」嚟踢，務求畀最大自由度佢衝鋒陷陣，所以尼馬24歲仔，已經以46個國家隊「士哥」，排喺名將輩出嘅巴西隊射手榜第5位，只落後第4位嘅薛高2粒，相信佢都好想喺呢次國際賽檔期數胡爬頭。

係，「森巴兵團」今屆外圍賽4戰2勝1和1負，成績未算標青，但當中失分嗰2場分別係作客硬撼智利同阿根廷，輸都情有可原。好在巴西主場鋒力唔錯，早前分別以3:1、3:0打敗委內瑞拉同秘魯。
客軍防線冇卡士

講真吖，除咗王牌射手尼馬，巴西仲有杜格拉斯哥斯達、韋利安等鋒將，火力其實好有保證。不過防線冇咗堤亞高施華，繼續由勁唔穩陣嘅大衞雷斯同今季畀馬體會放棄嘅祖奧米蘭達鎮守中路，話唔擔心就假囉！

今仗係烏拉圭射手蘇亞雷斯超過一年半以嚟，首度復出為國家隊披甲。呢位前鋒上屆世盃咬意大利守將基亞連尼，畀國際足協重罰佢停賽9場國際賽，點會唔餓波吖，何況今場對「阿蘇」意義重大，因為同佢情同父子嘅國家隊軍醫禾達費拉拿去年因病辭世，「哨牙蘇」講明禾達費拉拿係佢生命中好重要嘅人，會為佢全力爭勝喎！

之但係烏拉圭後防唔齊章，後衞高甸、荷西基文尼斯打柴，另一守將彭利拿要坐波監，隨時令曼聯小將古利姆華利拿攞到首頂喼帽。以佢嘅經驗同火候，點旨意佢守得住尼馬呢班星級球員先？既然兩邊同樣攻強過守，一場入球騷應該都走唔甩咯。