德 英友誼波攻「細」唔慌多

猪拉多纳

今晚熱身賽繼續有矚目戲碼上演，德國喺首都柏林主場迎戰英格蘭，兩軍近年熱身賽試陣居多，今仗的確堅難估邊隊贏面較大。德國自攞到世盃冠軍後，表現反覆；至於「三獅兵團」由作風非常保守嘅領隊鶴臣揸旗，對親傳統勁旅鮮有大手交易，以近7仗熱身賽6度開細盤嘅走勢嚟睇，相信今晚唔慌多波入，心水推介1.92倍入球細。
日耳曼兵熱身賽戰績曳

德國自從2014年世界盃稱王後，踢咗15場比賽只係贏得8場，完全失去世界冠軍應有嘅霸氣。佢哋踢熱身賽更加唔上心，5戰只得1勝，上年3仗先後打和澳洲2:2之餘、更以1:2、0:2不敵美國同法國，揸流攤意味甚濃。今次對住「三獅兵團」究竟以乜嘢心態上陣，真係不得而知。

另邊廂嘅英格蘭，雖然踢熱身賽嘅成績係好啲，近7仗取得3勝3和1負，之但係班波近4次對德國輸咗3次，包括最近1次喺2013年嘅熱身賽主場輸0:1，往績居下風。距離歐國盃決賽周揭幕愈嚟愈近，留番畀主帥鶴臣練兵嘅時間唔多，站喺試陣角度嚟睇，球員今仗發揮遠比勝負重要得多。
三獅多傷兵焗用新仔

睇番「三獅兵團」對上7仗熱身賽入面，夾埋有6次開細盤，當中對手包括對法國、西班牙同意大利。今晚同級數差唔多嘅德國交手，怕且戰情唔會太大分別。何況前鋒朗尼、翼鋒史達寧同門將赫特等主力齊齊打柴，加埋左閘賴恩貝特蘭日前又退埋隊，相信會由年僅23歲嘅畢蘭特負責把守最後一關，連從未為英軍披甲嘅守將丹尼路斯亦會擔正，喺咁嘅情況下，唔使旨意鶴臣會部署主動鬥攻囉，計落都係捧入球細有數。