馬主論戰

纯情小彩迷

揀得正執多W

　　勞愛德剛戰憑「好友福」贏馬兼捧盃，搏殺手風相當順，我睇好佢今晚繼續有馬贏，最啱心水係第七場「揀得正」（圖）。呢隻馬季初一直冇表現，但上場終於響谷草一哩重開勝門，似乎鬥心返咗嚟，計質素跑三班賽都唔會輸蝕，轉跑泥地隨時可以添食。

　　另一匹勞愛德坐騎鍾意頭場「大情大勝」，上季試過響泥地1200米輸唔遠，證明場地一定啱發揮，前速夠快嘅馬，今次就算排外檔應該都可以盡早切入，同場對手唔強，話唔定放到。

梁廷鏘

揀得正吼實共同努力

　　今晚八場全泥宴，根據以往經驗賽果冷多過熱，都係揀啲有分頭嘅馬捧場穩陣。先揀第四場「共同努力」，先後響田草1600米同谷草1800米跑近過，今次轉嚟泥地一哩上陣，隨時可以試出彩虹。

　　另一匹心水係尾場「新力高」，雖然以往跑泥地1200米威力最強，但其實響泥地一哩都累積一冠三季，表現絕對唔失禮。今次用蘇狄雄減磅上陣，比上場足足少負十一磅，肯定易發揮得多，估計臨場會有多少分頭，諗得過。

任達華

大智慧三班惡

　　最近有位相識咗幾十年嘅老友Oliver由美國嚟咗香港，今晚我將會同佢入場睇跑馬，希望佢可以帶嚟好運喇﹗講番心水，鍾意第六場「大智慧」，上次可以同泥地實力超晒班嘅「電光能源」串Q，表現唔簡單，今次落番三班跑泥地1200米，簡直虎入羊群，篤定補中。

　　另外推介尾場「齊喝采」，前仗響田草2000米仲跑緊包尾，上場轉爭泥地一哩居然即刻爆冷贏馬，證明泥地特佳。今次繼續跑贏馬路程，抽埋個一檔起步，再贏絕對唔奇。

張敬山