大戶早飛指引：再反阿仙奴

猪拉多纳

人有三衰六旺，近期大戶手風明顯轉順，是日重心推介場次，係英超護級分子新特蘭主場對阿仙奴，上周大戶睇死阿仙奴買下盤中到應，今次乘勝追擊再反阿仙奴，早早買定新特蘭下盤，睇嚟有啲計喎，肥叔認為入定啲冇衰。

（now 621周日晚9時05分直播）
新特蘭受讓頻贏盤

上周日英超阿仙奴領先水晶宮1球下，遲遲入唔到「咕臣波」，搞到完場前畀水晶宮一記遠射追和而失分，肥叔喺上周專欄講過一早睇到大戶開波前買定下盤，與以往「走地」先出手唔同，果然飛到波到準過天文台。雖然上周中補賽阿仙奴輕取西布朗兩粒，但大戶一啲動靜都冇，反而今仗作客新特蘭，又好似上周咁反阿仙奴，買定「黑貓」下盤。睇番初盤阿仙奴要讓半一已經唔多合理，因為佢哋近6仗作客僅2勝，而且水位不斷上升，依家升到九水，明顯熱唔透。加上新特蘭近6次受讓（平半或半一）比賽錄得4贏2輸，為護級搶分今仗實搏甩髀，最重要有大戶「指引」，呢個下盤有買趁早。
水晶宮讓唔起屈福特

至於足總盃4強水晶宮喺中立場溫布萊球場對屈福特，講真兩隊都係半斤八両，睇埋初盤水晶宮要讓平半，仲有逾2倍高水咁好分，肥叔一向睇盤做人，莊家明顯對水晶宮有戒心。況且呢類一場過淘汰賽，大家都會踢得小心翼翼，隨時處於膠着，更有利開下盤。