熱刺上盤布喜 哈利仔去盡衝冠搶金靴

猪拉多纳

今季英超冠軍屬「李熱之爭」，「二哥」熱刺上輪大炒史篤城後，今輪開始前同榜首李斯特城嘅差距收窄至5分，如果今晚鬥西布朗再下一城，就可以保持向「狐狸」施壓。熱刺今季主場曾先後淨勝曼城、曼聯、韋斯咸幾支前列球隊3球，今晚迎戰暫列第15位嘅西布朗，就算讓到1.5/2球都唔怕追，1.9倍上盤絕對係信心之選。

（now 621周二凌晨3時直播）

上場鬥史篤城梅開二度嘅哈利卡尼，係熱刺有望爭奪有史以來首個英超錦標嘅最大功臣。哈利仔早幾日仲喺社交網發布咗張獅子圖片贈李斯特城，暗喻熱刺好似獅子咁準備好獵殺「狐狸」，真係招積得佢吖！
信心爆棚鋪相「獵狐」

其實又難怪哈利仔咁寸嘅，話晒佢由開季至今已經射入24個聯賽入球，暫時排喺神射手榜首，分別領先曼城射手阿古路1球同李城箭頭占美華迪2球。哈利仔仲話上場淨勝史篤城4比0已經留咗力，原本係可以攻入6、7球添！無論幫熱刺爭標定係爭金靴獎都好，相信哈利仔今晚在公在私都會搏盡士哥，熱刺讓1.5/2球真係濕濕碎啦！
西布朗Hea踢等抖暑

再講吖，西布朗自從過咗40分護級線之後就大踢風流波，近3場聯賽輸晒不特止，近2場更加入唔到波添。佢哋今季達成護級目標，現時無任何名次要追逐，成班球員等緊收咧放暑假，咁嘅心態真係受讓幾多都冇着數，今場熱刺上盤可謂不二之選。