巴塞貝迪斯大駁火

猪拉多纳

西甲爭標三雄分途出擊

西甲進入最後3輪賽事，榜首三雄巴塞、馬體會同皇馬將分途出擊。一哥巴塞周日凌晨會作客貝迪斯，「地上最強」近兩場聯賽先後大炒拉科魯尼亞8比0同希杭6比0，鋒力唔講得笑，加上佢哋冇歐聯後顧之憂可盡情數胡，今場中位數就算轉咗3.5/4球，都必捧大盤。

（now 632周日凌晨2時30分直播）

巴塞現時與馬體會同得82分，以較佳對賽成績壓過對方排榜首，皇馬則以1分緊隨其後排第3位，換句話講巴塞只要贏晒最後3場就肯定衞冕成功。巴塞近兩輪全勝勁轟14球，走出早前4場聯賽不勝陰霾，當中蘇亞雷斯連續兩仗食「大四喜」，美斯同尼馬亦有斬獲，「MSN」攻擊威力重現，今場入波易過食菜。再者，貝迪斯近12次火併巴塞只有兩場交白卷，其中11場總入球更達4球或以上，今場大盤捧得過。
馬體會吼半主 皇馬捧大盤

至於二哥馬體會將主場迎戰華歷簡奴，「床單軍團」為爭標唔會放軟手腳，佢哋近5次主場鬥華歷簡奴贏晒，仲全部開出「主主」，為咗留力下周中歐聯4強次回合造訪拜仁，更需盡早奠定勝局，想炒起今季西甲失波最多嘅華歷簡奴話都冇咁易，捧半場主勝。

（now 632周日凌晨零時15分直播）

三哥皇馬就喺今晚早場造訪皇家蘇斯達，「銀河艦隊」上輪作客華歷簡奴喺落後兩球劣勢下，最終連入3球反勝3比2，足證未放棄聯賽爭標。皇馬今季累積攻入104球，為西甲火力最強隊伍，但同時近10仗聯賽作客又場場有失波，防線明顯唔多穩陣，況且佢哋近8次聯賽鬥皇蘇聯手炮製44球，每場平均有超過5球交收，今場大盤走唔甩。

（now 632周六晚10時直播）