哥倫比亞搶入8強捧Ｗ

猪拉多纳

美洲盃A組打到次輪，重頭戲梗係哥倫比亞惡鬥巴拉圭。哥倫比亞首仗輕鬆擊敗東道主美國，只要今仗再贏便可提早鎖定出線8強，挾住近3次對巴拉圭全勝嘅氣勢，今仗不勝無歸，主勝值博。

（now 650周三早上10時30分直播）

哥倫比亞首仗憑沙柏達華倫西亞及王牌占士洛迪古斯各省1粒，以2比0擊敗有地利嘅美國，過程異常輕鬆。雖然占士洛迪古斯喺末段傷出，今仗未知能否趕及披甲，但其餘主力如「意甲兵」卡路士巴卡、古達度等狀態唔曳，卡路士巴卡更有一次埋門中楣唔入堅唔抵。由於巴拉圭首仗只能悶和哥斯達黎加0比0，哥倫比亞今仗只要贏波，就唔使理另一仗美國對哥斯達黎加嘅戰果，肯定會攞到小組頭2名出線資格，為咗盡快鎖定晉級，今仗一定搏盡搶W。
巴拉圭攻力弱難爆冷

巴拉圭雖喺去年美洲盃獲得殿軍，不過兩大主力辛達告魯斯及巴里奧斯今次並無入選，另一老將希度華迪斯已經跌晒Watt，從首仗悶和哥斯達黎加，可見佢哋攻力極度疲弱。睇埋兩軍交手往績，哥倫比亞近3次對住巴拉圭贏晒，當中包括兩仗係作客，今次於美國中立狹路相逢，相信巴拉圭凶多吉少。