曼城拉布吼半和

猪拉多纳

Lead住5粒歎慢板!

過埋今晚之後，歐聯分組賽名單就會正式出爐！周三深夜嘅附加賽次回合大戰，英超勁旅「藍月亮」曼城再度登場，佢哋帶住5球優勢喺主場迎戰布加勒斯特星隊，出線可以話係大局已定，今晚1仗變成例行公事，主帥哥迪奧拿亦暗示會用副選出戰，擺明唔會同你搏命，2.9倍嘅半場和值得一博。

（有線62及202台周四凌晨2時45分直播）
哥迪奧拿畀主力抖

曼城喺首回合以壓倒性優勢贏波，出線資格已經定過抬炸彈，哥迪奧拿都講明會畀部分主力休息，預計阿古路、大衞施華及史達寧等主力可以抖下。曼城望落人才濟濟，不過2大新兵利萊辛尼同根度簡，預計要等9月頭國際賽後先至可以復出，而拿斯尼、韋菲特邦尼及赫特等亦已被掛牌兼打入冷宮，可以選擇嘅人其實唔算多。
藍月亮歐聯主戰例慢熱

據報今仗會擔正嘅耶耶托尼、戴爾夫同伊恩拿祖，季初少落場下狀態頗成疑問，尤其耶耶托尼已經疊埋心水等被賣走，更加唔會有好大戰意。曼城今仗當熱身賽嚟踢，主場出擊會睇定嚟食，「藍月亮」過去6次歐聯主場有5次上半場和波，其中4次更加係半場互交白卷，可以再博半場和，進取啲甚至可以揀埋0比0半場波膽。

至於羅馬尼亞冠軍布加勒斯特星隊首回合落後太多，士氣肯定受挫，喺反勝機會渺茫情況之下，球員亦未必會搏，今仗只求唔好再被羞辱，相信會守得幾耐得幾耐。事實上，星隊實力始終同曼城相距太遠，加上近5次歐聯作客僅1勝2和2負，估計難以對呢支英超豪門構成太大威脅，半場和好分頭下可以一試。