意軍上盤最色玩

猪拉多纳

新帥雲杜拿立威

今晚繼續上演世盃外圍賽，歐洲區G組以色列主場對意大利，值得留意，翻查紀錄，意大利過去5任領隊嘅第1仗大賽外圍賽，錄得4勝1和，充分發揮「新帥效應」。加上上仗熱身賽不敵法國，新領隊雲杜拿今仗當然唔想再失威，必然搏盡求勝。以色列近4仗主場3敗，受讓都冇着數，意大利讓半一，要上盤。

（有線61及201台周二凌晨2時45分直播）

意大利近5任領隊，只有鄧納東尼未能喺首仗領軍嘅外圍賽贏波，而且已經係2006年9月嘅歐國盃外圍賽打和立陶宛1比1。其餘4任主帥，包括納比兩次執教，以及柏蘭迪利、干地接手，都可以喺執教嘅首仗外圍賽旗開得勝。

雖然雲杜拿喺上仗熱身賽輸畀法國，但意大利一向唔重視熱身賽，唔可以作準。同埋上仗有中堅邦路斯因為家事離隊缺陣，未能排出祖雲達斯「BBC」防線，令法國有機可乘。幸好邦路斯已處理完家事歸隊，陣容更完整。雲杜拿今次徵召6位前鋒，鋒線位置競爭激烈，眾射手肯定使出渾身解數爭正選，射爆以色列。
以色列未夠班等劏

以色列史上只係踢過1970世盃決賽周，更加從未晉級歐國盃決賽周，近4仗大賽外圍賽主場出擊，錄得1勝3負，而且該勝仗對手只係「魚腩」安道爾。以色列今次人腳以土炮及比甲球員為主，質素較差，加上名將班拿約冇入選，更加難同意大利抗衡。