爭入三甲全力搏拳 車仔拖肥射手大鬥法

猪拉多纳

今晚英超壓軸大戰有最近氣勢如虹嘅車路士主場大戰愛華頓，雙方除咗要搶分殺入三甲之外，球隊兩大射手迪亞高哥斯達同盧卡古都要為個人名譽而戰，咁強勁嘅戲碼，入波又點會少，入球大細中位數2.5球，入球大係信心之選！

（Now 621及LeSports HK應用程式周日凌晨1時30分直播）

車路士今季自從換咗新意大利領隊干地後，成績比上季大躍進！球隊上輪聯賽淨勝修咸頓2比0，豪取4連勝，係佢哋至今最長嘅連勝紀錄！佢哋一口氣拎咗12分後，升上積分榜第4位，僅以1分落後畀曼城、阿仙奴同利物浦。有睇車仔作客「聖人」場波嘅球迷就知道，佢哋全場比賽製造咗好多機會，前鋒有波入，後衞又力保城池不失，就連領隊干地都大讚係一場完美無瑕嘅比賽呀！
夏薩特迪哥弗到漏

況且車路士今季唔使分心應付歐洲賽，試問邊個可以抹殺佢哋嘅爭標能力呀？再者，中場夏薩特上季嚴重跌Watt，但今季喺干地領軍下，呢位比利時球星已逐漸重現昔日射手水準，喺10月份就更加表現出色，除咗攻入3球之外，更為隊友交出1次助攻。呢位25歲主力領軍擊敗曼聯一仗中，更獲選為賽事最佳球員，狀態返晒嚟呀！唔只咁，前鋒迪亞高哥斯達亦都回勇，入球數字飆升，重新獲得球迷肯定，上仗聯賽更射入世界波，暫時以8個聯賽「士哥」力壓盧卡古及阿古路，坐擁射手榜首位。
盧卡古空襲有料到

另一邊廂，自朗奴高文上任帶領愛華頓後，表現有目共睹，球隊暫時位列積分榜第6位。另外，已經喺今季聯賽攻入7球嘅盧卡古，今季腳風大順，絕對係各支球隊守將嘅心腹大患！呢位比利時前鋒除咗走位靈活、反應快之外，今季更被朗奴高文強化咗多一項殺着——就係「空襲」喇！今晚兩大射手對撼，迪亞高哥斯達大戰盧卡古，相信兩位都爭住做英雄，一定會on fire射爆對方大門，入球大係明智之選。