英德西過3關撐起SuperSaturday 近5對賽4次開大 曼聯 阿仙奴強鋒駁火

猪拉多纳

今日歐洲三大聯賽爆發Super Saturday！英超、德甲、西甲3個不同時段，3場大戰陪住球迷，由晚上8時30分直到深夜5時30分，打頭陣8時30分有英超「傳統大戰」曼聯主場對阿仙奴，去到深夜1時30分就有德甲「國家打吡」多蒙特對拜仁慕尼黑，尾場就係西甲「首都打吡」馬德里體育會惡鬥皇家馬德里，3場都有電視直播，最好玩過關以小博大，見證歐洲各路雄師混戰，睇波增添樂趣。

今晚Super Saturday英超、西甲、德甲好波停不了，先由英超傳統大戰──曼聯主場硬撼阿仙奴打頭陣。紅魔雖有神鋒伊巴謙莫域坐波監，但正好畀「阿仙奴剋星」拉舒福特重打中鋒嘅機會，誓用入波騷哥利，對面嘅阿仙奴箭頭基奧特大有機會復任正選，勢必與奧斯爾、禾確特等隊友攻到你暈，連同王牌阿歷斯山齊士傷愈至少可於冷板候命，非常猛火，況且近5次交鋒，有4次總入球至少有3粒，今仗隨時合演入球騷，大盤（2.5球）有買趁早。（Now 621、LeSportshk應用程式周六晚8時30分直播）

儘管曼聯現時只係排第6位，主帥莫連奴似乎已搵到最佳陣容，於國際賽前嘅聯賽輕取史雲斯3比1之役，重用老將卡域克打防中，此舉為天價中場保羅普巴卸下防守重擔，可全力支援前線，令紅魔打出開季以來最流暢嘅進攻組織，神鋒伊巴謙莫域更打破聯賽609分鐘嘅入球荒。
拉舒福特係兵工廠剋星

雖然伊巴今仗要坐波監，但預計會頂替佢擔正嘅拉舒福特一樣唔能夠睇小，事關「福仔」嘅最佳位置係中鋒，但今季因伊巴加盟而被迫拉邊，令入球數字下降，今仗重操故業，誓要用入波，向「寸王」證明自己打中鋒一樣咁掂。拉舒福特今年極速上位，大部分士哥都係打中鋒取得，包括其英超處子戰──上季主場贏阿仙奴3比2，佢連省2粒兼助攻畀安達靴里拉入波，非常sharp醒，堪稱兵工廠剋星，與高大嘅伊巴唔同，「福仔」走位飄忽及入楔時間之精準，令對手防不勝防。
基奧特擔正向雲格示威

阿仙奴踏入黑色11月，不斷收到壞消息，先喺國際賽前嘅聯賽被熱刺逼和1比1，再有王牌阿歷斯山齊士（A山）及右閘比利連慘中FIFA病毒，為國服役期間齊齊受傷，比利連今仗肯定缺陣。好彩A山極速好番，周中世盃外為智利贏烏拉圭3比1之役更省2粒，就算今仗未必打正選，亦夠弗隨時候命。早前因A山打中鋒弗爆而失落正選嘅基奧特，預計今仗會復任正選，查實「銀河唯一」近3仗有2仗後備入替仍轟3粒，但依然冇正選已經谷住道氣，甚至有傳佢想離隊，今仗難得擔正，基奧特梗係要將一腔怒火化為入波，向主帥雲格示威，而今季腳風奇順嘅奧斯爾，因獲德國批准於剛過去嘅國際賽獲免役，可養精蓄銳打今仗，連同全面復甦嘅禾確特，呢3大「火槍」，對準基斯史摩寧、艾歷拜利、勞基梳爾等守將缺陣嘅紅魔防線，睇嚟主隊門神迪基亞有排忙。加上「魔仙」近5次交手，有4次總入球達3球或以上，兩軍中鋒又急於騷哥利，今仗等睇入球騷，大盤（2.5球）咪錯過。