曼聯搵韋斯咸報仇

猪拉多纳

英聯盃8強冤家路窄

今晚繼續上演英聯盃8強，曼聯繼上仗英超之後，又喺主場再鬥韋斯咸。雙方3日前打和1比1，紅魔鬼唔止痛失2分，仲有保羅普巴「插水」累積第5張黃牌，今場需要停賽，領隊莫連奴被逐，亦面臨重罰。不過，曼聯今季變身「盃賽專家」，盃賽主場4戰全勝，今鋪有望大翻身，難怪讓一球/球半，盤口比上仗英超更辣，明顯備受莊家睇好，一於捧上盤。

（周四凌晨4時開賽）

曼聯踢英超確實不堪入目，已落後榜首車路士11分，爭標機會固然渺茫，連打入前4位參加下屆歐聯，都唔容易。不過紅魔鬼轉戰盃賽，演出往往脫胎換骨，其中4場主場贏晒，包括上圈英聯盃擊敗曼城，上周中歐霸盃更大炒飛燕諾4比0，所以千祈唔好以為曼聯會重蹈上仗聯賽覆轍。
米希達利恩擔正搏命

雖然曼聯今仗有兩位中場保羅普巴同費蘭尼停賽，但未必係壞事，皆因保羅普巴今季以天價成「魔」後，根本踢唔出效力祖雲達斯嘅水準，進攻貢獻唔多，防守更加唔掂，由佢擔任中場大腦，反成負累。兩位大隻佬坐波監，米希達利恩有望擔正，呢位阿美尼亞國腳好有級數，加上少有陣會上陣，所以一落場就好搏命，例如上周中歐霸盃，米希達利恩正選披甲，表現光芒四射，成為球隊大勝功臣，若然紅魔鬼今仗以副選出擊，隨時有更佳效果。有傳舒韋恩史迪加都有望上陣，「小豬」為保飯碗，肯定亦會搏老命。
讓到1／1.5球辣過英超

至於韋斯咸位處聯賽榜下游，開始有降班危機，恐怕難以兼顧盃賽，今仗戰意未必及上仗聯賽咁強。而且韋斯咸人腳亦有限，球員一周雙賽，體力負荷好大，仲要係連續兩場硬撼曼聯，更加吃不消。韋斯咸上仗受讓一球，但今仗卻受讓一球/球半，隨時係糖衣陷阱。