撐圖盧茲雷恩 PSG發力追分炒鑊甘

猪拉多纳

法甲今晚有唔少賽事，阿King梗係索到好嘢啦，當中最有心水係班霸巴黎聖日耳門（PSG）作客甘岡。PSG現時排積分榜第3，想追近榜首尼斯同摩納哥，嚟緊賽事不容有失，今仗對手甘岡近況反覆，加上近年對賽都輸波，相信難擋志切贏波嘅PSG，讓球主客和PSG讓一球，阿King推介2.15倍讓球客勝。

（TVB 303及Now 714周日凌晨零時直播）
甘岡兼顧盃仔腳軟

PSG早前陷入小低潮，聯賽連歐聯3戰只得2和1負更失了7球，幸好球隊喺周中法聯盃以3比1輕取里爾重回勝軌。PSG喺嗰場波其實只係出副選，主力好似中堅堤亞高施華、翼鋒迪馬利亞同射手卡雲尼都冇落場，擺明留力踢呢場聯賽。至於甘岡喺周中法聯盃同里昂激戰百二分鐘仲要射埋12碼先晉級，主力射手拜恩特同迪柏禾都有上陣，球員未必回得切氣。況且甘岡近3次對PSG輸晒兼且一球都入唔到，心理上點都會有啲輸蝕，今仗好難抵擋PSG攻勢。

至於另外兩場賽事，圖盧茲近況雖然反覆，但佢哋主場表現一向唔錯，近6次對南錫又贏晒，一於捧主勝。（TVB 303周日凌晨3時直播）剛喺法聯盃慘吞摩納哥7蛋嘅雷恩，今季10仗主場取得8勝2和佳績，面對近7場作客得1和6負嘅巴斯蒂亞，有力打場翻身仗。

（周日凌晨3時開賽）