墨爾本雙雄大騷娛賓

猪拉多纳

打吡戰砌盡駁火格局

澳職今日下午上演「墨爾本打吡」，由墨爾本勝利主場迎戰墨爾本城。同市球隊硬撼，唔止搶分咁簡單，更要為面子而戰。所以每逢打吡戰都會搏甩髀。墨爾本雙雄近7次聯賽對決，總入球皆達3球或以上。加上兩隊今季踢法有前無後，更有利合演入球騷，中位數2.5球嘅大盤有1.55倍值捧場。

（有線64及203台周六下午4時50分直播）

墨爾本勝利上輪榜首大戰惡鬥「一哥」FC悉尼，喺領先情況下畀對手連入兩球由贏變輸，現時畀FC悉尼拋離12分但踢少一場，常規賽爭標機會唔大。其實勝利該仗表現唔錯，踢得非常進取，射門次數更比FC悉尼多足1倍，但後防接連犯錯累事，特別係中堅占士當拿治下半場被逐成為輸波關鍵。
勝利雙箭腳風順

墨爾本勝利呢條豆腐防線近4仗合共失9球，今場分分鐘又會出事，不過佢哋為咗拉近同FC悉尼嘅差距，亦唔顧得咁多。好在球隊火力唔弱，今季轟入37粒只係僅次於FC悉尼，一對進攻好手貝利沙及馬高洛查士就夾埋貢獻咗24粒，要撕破客軍防線問題不大。

墨爾本城亦屬攻強守弱，近7場有6次總入球達3球或以上，包括曾喺主場1比2不敵今場對手勝利，而「墨城」喺上年10月兩次作客勝利都贏波而回，包括首循環大炒4比1，以及澳足盃作客淘汰勝利，可見墨爾本城踢打吡戰作客表現更為醒神。睇番對賽往績，兩軍近7次聯賽交手，總入球均達3球或以上，中位數2.5球嘅入球大值博。