西維爾踩多李一腳

猪拉多纳

「狐狸」勁頹英超5連敗

今晚深夜繼續有歐聯16強首回合上演，西甲嘅西維爾主場對英超嘅李斯特城。西維爾主場表現向來有保證，強如皇家馬德里嚟到都要輸波而回，可見呢班波自己地頭出擊特別醒神。「狐狸」李斯特城雖為上季英超冠軍，但今季表現大跌Watt，近8場賽事2和6負，今仗造訪西維爾相信都係凶多吉少，「讓球盤」西維爾讓1/1.5球，細鬼都照捧上盤。

（有線61、64、201及203台周四凌晨3時45分直播）

西維爾現時排西甲第3，球隊今季表現唔錯，尤其主場更出色，聯賽11場主場賽事取得9勝1和1負，贏波率高達8成。西維爾喺智利主帥森柏奧利嘅帶領下，一向以入得又失得見稱，但佢哋近3場賽事竟然喺冇失波下取得2勝1和嘅戰績，踢法上似乎有所改變。

西維爾今晚雖然會有森柏奧利同中堅加比爾馬卡度需要坐波監，而前鋒高恩迪利、後衞泰莫連拿斯都有傷唔踢得，但以佢哋近期嘅表現，加上主場優勢，相信有望先拔頭籌。
華迪馬列斯陷入球荒

李斯特城呢支英超衞冕球隊今屆喺歐聯表現出色，但聯賽就差天共地，現時排喺17位深受降班威脅。「狐狸」自踏入2017年後，只曾喺英足盃贏過愛華頓，近8仗錄得2和6負嘅劣績，當中聯賽更5連敗1球都入唔到，反映球隊攻不銳守不穩。上季表現出色嘅李斯特城防線近期錯漏百出，至於前線主力好似占美華迪同馬列斯狀態低迷，齊齊陷入球荒，加上今仗要作客西維爾，相信就算強陣出擊都好難攞到甜頭，因此「讓球盤」西維爾讓1/1.5球都要支持上盤。