賠率有路捉：和諧大使本利歸還

魑魅魍魉

　　第八場「和諧大使」上仗初跑泥地，立即被捧成55蚊大熱門，仲要熱過泥地好手「穿針引線」同「百贏萬歲」，睇得出有人極之睇好。雖然最終三甲不入，但跑第五只係輸兩個馬位，及格有餘。上次熱失一定有人損失慘重，但冇回師首本谷中，反而繼續報泥地一哩，證明有人認定佢泥地實掂。睇噚日早飛，W67蚊，P21蚊，仍然有支持，加上柏寶唔放手，估計今晚一定有料到，有權連本帶利攞番。

藍老虎票勁有計

　    頭場四班1200米，葉楚航嘅「藍老虎」獨贏居然只得57蚊，仲熱過啱啱新勝同程嘅「寶貝」，只係僅次於40蚊W嘅「神殿」，係呢場早飛次熱門，真係始料不及。一來隻馬今季七戰全負，自從上季贏馬後可謂一沉不振，二來佢初次跑泥地，試問何德何能成為次熱呀﹖不過今次有柏寶壓陣，同埋減分已多，比上季贏馬時低十分，確實有看好嘅理由，既然有強勁早飛支持，千祈咪睇小。

騎師王熱捧柏寶

　    騎師王方面，除咗鍾意柏寶上述兩隻頭尾場嘅「藍老虎」同「和諧大使」外，佢手上嘅「時時攞彩」、「壽比南山」、「天寶之威」同「勁飛馳」統統係有近績支持嘅質新惡馬，唔少仲係泥地專才，相信冇W都有P，就算只得兩倍都值得捧場。

周仲