馮諾嘉手記：蜚聲當起 上三班夠爭

魑魅魍魉

　　禮拜三晚連場大雨，場地受影響之外，仲要行雷閃電，好多馬都怕行雷，強行比賽對人馬都有一定危險，結果第五場賽事一度暫停，原本已出去行圈嘅馬都要拉返馬格。當晚馬迷除咗怕賽事會中途腰斬外，落咁大雨亦怕會連場爆冷，話口未完，第五場即刻爆出千五蚊Q，跟住嗰場條Q亦有成千六蚊，三T三關都爆，馬迷見到咁嘅情況，當然唔敢出手，有啲更提早離場。天文台預測禮拜日將有狂風雷暴，雨勢可能比禮拜三晚更大，預期會跑黏地，賽事分分鐘唔能夠如期進行，馬迷們要留意喇﹗

　　早排講過韋達嘅頭馬數目要追過柏寶唔係咁易，皆因柏寶鬥志相當強，方嘉柏早前搵佢騎「綠色駿威」遠征新加坡，騎者都即時拒絕，表明留守大本營，雖然最終「綠色駿威」贏一級賽，柏寶在港並無頭馬進賬，損失認真大，但柏賽目標明確，禮拜三晚起孖，反觀韋達只係連番入位而冇馬贏，兩者頭馬數字差距愈嚟愈大，已相差七場咁多，最重要係韋達當晚尾場騎「沙貝利」時，因為不小心策騎要罰停賽兩日，柏寶一定會乘機將頭馬數字再拋離遠啲，對比早輪韋達反先之時，戰情真係可以用峰迴路轉嚟形容。

　　既然柏寶咁有決心，嚟緊禮拜日都要支持佢手馬，尤其係嚟自姚本輝馬房嘅馬，第一場四班1000米直路賽嘅「錢照贏」，同埋第九場三班1200米嘅「蜚聲」（圖）都值得重視。「錢照贏」周歲馬初出，操足而臨，早前喺潘頓胯下試大閘一放到底大勝對手，走勢對辦，早幾日柏寶過檔操磨，勇態已備，今場對手麻麻，唔少係未有表現嘅質新馬，有機可乘，可望一出即勝。

　　「蜚聲」喺香港跑三場不勝有位，上場跑同程後上以頸位壓倒大熱門「活力至寶」贏馬，今場雖上三班，但對手唔算強，同場有好幾匹馬近績曳，憑質新當起，可爭連捷。