馮諾嘉手記：金德寶捧沙田銀瓶

魑魅魍魉

　　天文台預測呢兩日會多雲有驟雨，但噚日嘅天氣相當唔錯，沙田馬場附近仲陽光普照，睇天色真係唔多似會有雨落，刨起馬上�a都有啲頭痕。

　　第二場四班1200米，有三匹初出新馬，三駒之中較唔起眼可能係「川河勁駒」，皆因「幻想家」、「塑料旺」早前試閘都有啲走勢，反而呢隻馬近兩次試閘都響後面過終點。不過計血統，「川河勁駒」一啲都唔失禮，皆因佢與「黃鑽石」同母，記得後駒當年響田草1200米大勝對手七個馬位開齋，今次蔡約翰部署呢隻馬跑同程，有權一出劏晒。

　　對手方面，「駟馬難追」前仗響谷草1200米獲亞，上場走二叠蝕位下亦輸唔遠，今次要繼續吼實。

　　「皇仁勁駒」上仗初出跑第五唔曳，增程跑1200米仲啱發揮，要拖。「龍得風雲」未開齋一定好鬥志，熱都要揀，四連環拖埋「幻想家」。

　　第七場沙田銀瓶1200米，睇好吳廐「金德寶」，在港跑過五場獲三冠一亞，唯一失三甲嗰場係跑谷草1200米，但實際亦僅負四分三馬位，證明夠晒忠心。

　　睇番上仗響直路賽彈甩「開心歡笑」三個半馬位輕勝，再次證明質素超班，今場吼準盃賽上陣，強配柏寶可再贏一場。

　　配腳有「極奇妙」，上場力壓「綠色駿威」贏馬，水準有目共睹，一定要吼。「同一世界」級數高，三甲一席都好穩陣。「好友福」季內愈戰愈勇，雖然今場對手好強，但都有權跑得接近。四連環揀埋回配韋達嘅「紅衣司令」，或者今次會有唔同演出。