高清睇跑馬：極品絲綢增程惡

魑魅魍魉

　　今季總場次605田草新馬1000米，「陽明飛飛」出閘應聲彈出，韋達見此未有推騎，由於內檔的「超晒班」切入外欄，故八百米處一度受阻，韋達同時稍稍移向內檔，全程靠外欄數出第四叠競跑，中段開始加速，好快已過晒所有馬，以為可直奔終點之際，冷不防廐侶「如願以償」自外欄逢馬過馬，因為對手走勢太勁，韋達亦無謂勉強，末段未有再催迫「陽明飛飛」，但季軍「幸運多多」至少落後六個多馬位，再看「陽明飛飛」跑出五十六秒九，確認質素非凡，蔡廐馬熱身一場後表現將更佳，周日跑1200米贏面大。

　　另於季內總場次557田草2000米女皇盃，「極品絲綢」如常留前鬥後，因此早段有內檔唔走，一早移出二叠，跟住突然採取主動的「爆冷」，到對面直路雖然仍保持尾四，但步速慢得很，尤其轉最後彎位時，未有一匹馬發力，步速變得慢上加慢，最後仍能後上跑第三，相當難得，更吸引之處是入直路時，牠移出外檔蝕位不少，反觀頭馬「爆冷」只是由二叠走出三叠，亞軍「壁虎夢」更全程貼欄慳位，後駒轉戰一級賽新加坡新航國際盃且補中，故此這席季軍絕對水準極高，今戰增程跑遮打盃2400米，絕對有惡氣。

Sam