借題發揮：連續6期日行一善 勞愛德小勝格局

魑魅魍魉

　　嚟到季尾，馬友們話題都係離不開騎練爭冠軍嘅形勢，練馬師方面，蔡神仙好似幾篤定，任你大摩近期攻勢有幾勁，每日三兩場W濕濕碎，阿蔡依然帶甩十場八場，追極都埋唔到身﹔騎師嗰邊，情況又係差唔多，韋達嘅優勢只係曇花一現，柏寶目前拋開6W，仲要韋達又停賽兩期，唔知會將二人的距離拉開幾遠，加上只剩下12期賽事而已，要反先的可性唔係冇，不過真係渺茫多少。

　　開騎師，近期勞愛德密密贏馬，不唔係好覺眼，點解咁講呢﹗因為佢童軍咁⋯.日行一善，仲要差唔多喼咗成個月，由8/5嘅「標青」計起，已經6期咁長嘞，唔知呢次會唔會又係咁嘅模式，不過如果想捧佢騎師王的話，又真係要諗真吓囉，雖則唔係冇人試過贏1W做到騎師王，但如果佢今晚又嚟日行一善，風險真係大咗啲。

　　當然，德叔日行一善還日行一善，都叫做喼住有馬贏，手風唔係冇，尤其呢次佢有一批唔錯嘅坐騎，如「大情大勝」、「靚到爆」、「紅褲子」等等，不過，講到有冇冠軍相的話，好似大部分都位望高啲，如果係要捧W，頭場「大情大勝」比較博得過。事關「大情大勝」同德叔幾夾吓，騎6次有4次上名，此外，呢隻馬排內檔叻好多，今季3次排1至3檔跑谷草短途，全部入三甲，所以今場有1檔，兼跑番1000米，有機會放到。

亨利