馮諾嘉手記：柏寶展露好笑容

魑魅魍魉

　　聽日沙田馬場舉行十一場賽事，仲會越洋轉播日本安田紀念賽，戲碼相當豐富；而今晚亦有五場海外賽事舉行，重頭戲當然係葉森打吡，呢場賽事只限三歲馬參加，由於獎金豐厚，吸引咗唔少強手角逐，馬迷千祈唔好錯過！

　　剛戰韋達停賽，柏寶有多匹坐騎被捧成大熱，結果全部倒灶，令唔少馬迷大失所望，其中全晚最熱嗰匹「美猴王」，響直路塞死大敗，文家良返過磅室時更加面都黑埋。不過，今戰練者仍有兩駒交畀柏寶搏殺，相信後者一定會醒醒定定，做番齣好戲。

　　頭場四班1200米，「好笑容」跑過幾場熱身後，上場響直路賽跑入一席第四，似乎已經跑起咗狀態，今次即刻強配柏寶上陣，明顯係有備而嚟，即管睇吓騎者能否贏番場，一吐剛戰悶氣喇！配腳方面，「好辣椒」上場全程走外叠蝕位落敗，賽績唔能夠作準，可以畀多次機會。「寶貝」未必淨係泥地先掂，用何澤堯減磅咪睇小。「勁多勝」勝後回氣一場，隨時施回馬槍，四連環揀埋上場跑近嘅「巧奪天工」。

　　第八場三班泥地1200米，小妹用「時時攞彩」做膽，季內三戰此程全勝，上場更拋甩亞軍「勝利旋峰」成三個幾馬位，三連捷機會高唱入雲。配腳拖番同程未甩過三甲嘅「聖迪達」，三歲馬肯定仲有分在手，配腳首選。「天久」至今三仗非勝即位，證明馬有質素，響外地已經跑開膠沙地，相信轉戰泥地亦合發揮，要拖。「勁飛馳」、「時代明星」都係泥地短途專家，而且近態都相當唔錯，宜一併吼實。