借題發揮：一言為定出得急有心搏 何澤堯友運行

魑魅魍魉

　　今期騎師陣營當中，焦點未必得一個柏寶，冇錯！佢呢次係有一手幾好嘅馬，加上有成10匹坐騎咁多，冇理由又會好似上期夜馬咁捧蛋啩？！正常預測，應該可以坐住兩場頭馬。但那邊廂，小將何澤堯今期坐騎亦唔講得笑噃，一來，出馬唔係少；二來，佢在中下場嗰幾匹馬，如果好運啲嘅話，可能坐二望三W，所以，今日除了阿寶之外，何仔嘅馬都唔好睇小。

　　望落何仔頭幾場嘅坐騎，坦白講，真係冇乜邊匹揀得上手，充其量係「算得妙」好少少，反而下半場就唔同嘞，至少有師父射住，「一言為定」、「智友」、「天久」等等，全部係餐士面，話唔埋佢又會一如之前賽事咁，一係唔贏，一贏至少單日三兩W。

　　「一言為定」跑過一場嘅新馬，喂！3歲仔之嘛，使唔使出得咁急，上個禮拜日先跑完，第二日即刻打埋王牌報名又嚟過，雖然方廐匆出唔係稀奇，都未至於咁啩？！亨利覺得最大理由驅使練者咁做，應該係上次初出的表現喺佢預計之外。如果大家有睇過隻馬上賽點跑，或者亦會同意我嘅睇法，隻馬陣上際遇若果唔係差到貼地（終點前都仲阻緊），已經有本事上名，睇嚟手上虛分多的是。開氣後即加程，方仔讓此駒匆出之餘，肯在路程上配合，點會唔想交差。

　　而「智友」和「天久」有咩優點，近績大致上已反映晒，一隻近6場攞咗4W1Q，另一隻出道後未甩過P，總之都係準到不得了，買WP搵呢啲馬，點都放心啲啩！　

亨利