洪禮賢 講馬：京城孖寶處境着數

魑魅魍魉

　　韋達刑滿復出，出馬又多，正常預測佢今晚點都有聲氣，但見佢在隔夜騎師王賠率又唔算熱，唔知比較軟弱的票數係咪反映佢今晚有啲危﹖相比之下，白德民今晚有部分坐騎或更值得重視。

重心場次：第7場  第三班（80-60分）1000米

　　喜萬家連周末直路賽都唔跑，係要再跑未贏過的此程，心態上似有心再搏﹔上場如果唔係在對面直路被影響，多走唔少冤枉路，應該有Ｑ。今次好位，跑法想點就點，賽事形勢好到痺，不難再入圍。

　　「勁勇士」賽績梗係犀利，但在三班已再冇輕磅優勢，今場真真正正考進度。「旅英駿駒」四戰冇Ｗ有Ｑ，又係準到不得了，可惜排了12檔，究竟會帶來幾大影響，真係好難講，尊重其忠心程度，拖一注。

　　「此時此刻」加鼻箍後見成效，剛仗直路走規冇晒問題，仲愈衝愈勁，照計留喺三班大把着數。「祥禎」恃輕磅應可拉近與前幾駒的實力差距，但始終係新升班，要即刻克服阻力，難度幾大。

　　「科研精英」速度夠，本來唔驚9檔，但佢內側有一堆快馬，擔心早段泊唔到埋去，加上初跑谷草，未必蝕得起。「應變計劃」剛仗在處理上未做到最好，呢次繼續排好位而換人，可能跑高啲。

第1場  第五班（40-0分）1650米

　　浪漫添馬連續兩場改了主動跑法，能力翻一番，上場更贏到啲對手埋唔到身，很難相信以此際銳氣，加8分會消化不來。「第一好運」耐冇出，但期間工序冇停過，大有做番夠至出的心態，苟如是，以目前分數唔難爭取好成績。

　　「好利高」老馬能力不斷減值，好在今次配搭好和排檔唔錯，希望有接近演出。「智勇非凡」段段有跑法，夾埋2檔，原本條件OK，唯一擔心係谷草從來唔上名。「威威」早前試閘的印象普通。

第2場  第四班（60-40分）1650米

　　天鷹剛仗「外遊」換來大敗賽績，不用太介意。落番四班之後，跑到呢次才回到主項，有埋好位啱晒，隨時變身。「回鄉精神」同程能壓倒「永得勝」埋Ｑ，在此班值中上級實力，好開要跟。

　　「天下寶」四班長期會近，尤其今場負磅稍減。「歡騰」遇到早段未必快的場合，10檔亦有可能切入帶放，如果做得到，對手唔易反先。「福至心靈」上一哩啱數，谷草亦早有經驗，最睇唔透係佢。

第3場  第四班（60-40分）1200米

　　京城孖寶半年冇跑過此程，如果一心為減分落班，呢次都唔使返強項，所以在邊緣分數亦未必會等落班，實在目前在四班的處境已着數，孭住113磅，殺傷力好大。「贏啲啲」長又得，短又得，紮穩了狀態，應該唔難喼到。


　　「鄉村傳奇」三班冇能力，四班搵到食﹗「贏馬組合」分數減番6字頭以下，漸漸令壓力消除，不過本身唔夠狀態。「權勇駿」剛仗有番久違了的追勢。「龍得風雲」得個準字，爭二至四名居多。「清風駒」剛仗因好位跑得接近，但12檔預咗會蝕。「奇蹟」跑番1200米會叻好多。

第4場  第三班（80-60分）1650米

　　福喜80分樓下長期搵到食，尤其係路程上肯配合，至於上場大好形勢衝落連Ｐ都冇，或是內外檔跑道的偏差。今場位好而對手又唔強，上名應不存太大阻力。「勝利雄威」上場末段唔係受困，贏埋都唔奇，反映此際進度在三班都吃得開。

　　「馬風雲」目前分數承受好大壓力，要贏唔易，不過話晒係路程專家，三三四四可能會有。「銀太陽」和「超勁精神」跑法完全唔同，論形勢則可能後駒好多少。「企業精神」減分程序大致成功，只係等佢跑番田草中程。

第5場  第四班（65-40分）1650米

　　勝任有餘贏來愈見輕鬆，不用加磅再跑原班，就算有部分對手係三班馬，計死數仍有賺。「中環英雄」唔少同父馬擅跑谷草，轉場唔會有好大風險，只係驚短直路爆唔起而已。

　　「威力高」跑低半班，形勢可反客為主。「共同努力」又排外檔，希望早段快快手移入，或再一次出現上賽有利環境。「高耀之威」剛賽入Ｑ的水準唔曳，呢次仲要降半班，點會冇影響力。

第6場  第三班（80-60分）1200米

　　滙名燈準繩係主要賣點，其次係用上小蘇，在此班只負中磅，令原本稍吃緊的處境得以鬆綁，或有贏面。「定做」和「金紫荊」一對快馬，如非早段鬥燒，隨時齊齊放返。

　　「駿蹄飛」11檔唔易克服，加上本身在此班只是中下級之馬，冇形勢或打回原形。「御將軍」穩紮穩打，正路配腳。「多多昇」上場塞車才會名次落後，今場排1位，可能幫好多。「軍刀」唔加程，總覺又會出現近而不入三甲的情況。「皇帝出巡」差唔多到位，應該在三場之內，呢次有分頭已可拖一注。

第8場  第一班（105-80分）1800米

　　特寶樂及「藍天」一對方廐馬，季內演出有眼見，無疑此程不及一哩咁強，諒可在前列佔一席位。

　　「魔法幻影」轉場賺晒形勢，同埋，由級際賽回到一班，變得更惡。「金碧亮馬」久不久會有一場出現突破性演出，希望今次可喼到。「勇將軍」及「創佳績」耐冇跑，怕進度趕不上。「沙貝利」回了兩場賽事，如果體力補充番，或可掃晒。