馮諾嘉手記：暖在心頭強配交代

魑魅魍魉

　　四年一度嘅世界盃開鑼後，個個都喺度講緊今晚邊隊波會贏。某收費電視台獨攬世界盃播映權，但正所謂「你有張良計，我有過牆梯」，有啲唔甘心為咗睇一個月波而被迫簽長約嘅球迷，就響網上搵到好多渠道睇世界盃直播，就連唔少食肆都搵到一啲外語台睇世界盃直播。不過，如果球迷想聽埋廣東話旁述嘅話，去馬會各大投注處都有得睇，而且落注仲夠晒方，都不失為一個好去處。

　　第二場五班1800米，小妹揀咗用「暖在心頭」做膽，以往跑過多仗都冇表現，但上場初戴眼罩上陣，即刻響田草1600米入Q，只係以一個馬位輸畀「年年如意」，證明已經摸啱咗配備，今場增程兼強配柏寶，擺明係求交代格局，今場重心。配腳先拖「兄弟班」，上場除去所有配備即刻入Q，要繼續跟進。「心喜悅」、「勁霸龍」近仗都輸唔遠，可一併兼顧，四連環拖埋已展現過戰鬥力嘅「朝東之星」。

　　第七場三班1600米，小妹鍾意「豪情拍檔」，近三仗非冠即位，睇得出真係愈跑愈進步，上場能夠輕取再出都入Q嘅「納帕二號」贏馬，證明實力的確唔簡單，續配鄭雨滇有力再下一城。配腳方面，「蓋世子牙」上仗響谷草一哩大勝對手，姿態夠晒誇張，一定要拖。「威騰駒」兩度響同程入Q，未能贏馬差啲運氣，今次用到韋達唔似陪跑。「實業英雄」上場大幅增程，長力未夠先至落敗，縮返落1600米應該會有唔同表現。四連環揀多匹上場跑近嘅「迎利多」，四歲馬已經開始上力，今場搵埋柏寶操刀似樣。